盛記酒家

營業中

休息中

本身老公呢晚會喺呢頭放工，又想食中菜小炒煲類嗰啲，所以就諗起群策大廈。自己早到喺大堂見到有間「 盛記 」， 有諗前身係唔係兜記，不過無所謂啦，一於試試。菜式都幾多選擇，一般小炒$108-$148。眼見份量都幾足、幾大煲，所以諗住兩個人嗌兩個餸就得。點知阿爸阿媽忽然打嚟話喺附近，想一齊食飯！好彩呢度坐得算舒服唔迫夾，啲野食又幾惹味同大份，兩老應該會滿意，所以就忽忽然變成一枱4人嘅family dinner。芥醬 $4/位茶茗 $15/位白飯 $14/碗見啲煲熱辣辣好香，一次過叫咗三煲！《 南乳粗齋煲 💲118 》好多料，雪耳、雲耳、茄子、菇、西蘭花、菜同粉絲，全部索晒汁好正，啲汁好香濃惹味。《 鹹魚雞粒豆腐煲💲118 》啲豆腐粒炸過幾香口，入面就好滑，鹹魚雞粒都幾多，啖啖都食到。整體咸香又不過分。《 紅酒燴牛尾煲 💲148 》牛尾好多，啲肉好稔又帶點膠質好正，再加咗洋蔥同甘筍，夠稔入味，個醬汁更多份鮮甜～呢三個煲都好岩撈飯食！《 炸子雞半隻 💲148 》炸得雞皮好香脆，但啲肉又唔會乾同油，蘸喼汁好提味。4人4個餸加白飯已經飽到上心口，埋單都係$600有找。