紫荊閣海鮮酒家 (已結業)

以前工作地點附近就係呢間出晒名食懷舊菜嘅酒家，今日終於可以親身嚟試一吓！八點幾，好容易就有位，部長都好殷勤招待，不想等得太久先有得食，我哋即刻坐低就叫咗： 鴨掌包：以為一定要叫四隻，但係阿部長話其實都可以叫兩隻嘅，為咗可以食多啲嘢，我哋梗係叫兩隻啦！鵝腸包住鴨掌、叉燒同雞膶，原本以為會好硬，但竟然有驚喜！鵝腸有啲脆，鴨掌係硬身少少都還可以接受，最好係啲叉燒，軟而多肉汁，襯埋雞膶綿綿嘅口感，好正！ 富貴龍鳳球：真係好富貴，成百蚊，入面係蝦仲有雞膶，有層炸粉包住先炸，外面鋪滿沙律醬，上面仲有啲芝麻。不過我哋覺得層炸粉怪怪咁，有啲似咸水角層皮，接受唔到！ 百花釀蟹鉗：都算大隻，係我哋食過嘅炸蟹鉗中入面最多蟹肉嘅一間，（當然除咗旺角鳳城）肉有啲散，但係味道就真係好有蝦蟹味嘞！ 八寶鴨：要咗半隻，其實兩個人真係食唔晒，但係都想叫，因為想試！八寶鴨係最後先上嘅，賣相好靚，扒開隻鴨，入而有好多料，有蓮子、蛋黃、薏米、仲有啲唔知係乜，但係就好好味，啲汁亦夠濃味，鴨肉入口即化! 汽水2罐嘩！好飽！最後隻八寶鴨都係食唔晒打包番屋企宵夜再戰！