荷華庭園景餐廳 (已易手) 新餐廳

無端端水都無帶走咗去行山，雖然簡單易行，行完都好鬼肚餓 🤣🤣🤣 呢個時勢個個都去郊外行，沿途餐廳都要等位，我哋咁餓梗係撇啦，去到呢度有位就諗都唔諗坐底叫嘢食啦 🤭一坐底佢哋好好先比張餐紙你放好口罩架。我哋叫咗 2 個午餐，頭盤揀咗三文魚沙律同西班牙火腿併蜜瓜，三文魚份量算多，沙律菜都新鮮，反而西班牙火腿同蜜瓜都淡味。主菜叫咗個黑松露海鮮意粉同燒豬肋骨，意粉好足料好多菇，但個豬肋骨就好失望，完全唔入味，啲肉又鞋口 🤦‍♀️甜品跟餐個椰汁紅荳糕好香，但我見隔離檯加錢換個梳乎里我又身痕跟，由於最少要 2 份先做，所以原本想要薑汁味唔得，要痴隔離檯嘅 Vanilla 味，上檯好香，但食落好濕。 。 。試過就算吧！午餐無餐飲跟，呢度環境尚可，但價錢比較貴，相對大尾督一帶餐廳呢度性價比輸晒。