上海姥姥

營業中

休息中

今日同老婆、媽咪同姨媽一行四人去咗大埔慈山寺參觀，參觀完肚餓到飛起，馬上搭的士去返大埔中心搵食。商場裏面人頭湧湧，去咗幾間餐廳攞飛。好好彩，我哋最想食嘅上海姥姥最快有位，仲要有得坐卡位㖭。我哋叫咗擔擔麵配排骨、姥姥家鄉粗炒、招牌小籠包、四喜烤麩、同炸菜肉末窩窩頭。我哋最欣賞嘅係擔擔麵，麵煮得啱啱好，軟硬適中，湯底超正，好濃郁，花生味好香，帶有少少辣好開胃。家鄉粗炒都炒得好惹味，調味好。不過略嫌配料太少，如果加多少少蔬菜、肉絲、冬菇片嘅話，口感會更豐富。招牌小籠包都好好食，一咬落去啲湯汁湧晒出嚟，湯汁好香，餡料都好食。四喜烤麩調味係好食的，甜甜到好惹味，不過烤麩煮得太淋了，無咗彈性無咁好食。炸菜肉末窩窩頭係期間限定，賣相好可愛，窩窩頭其實係炸饅頭，底下挑個窿，然後將肉碎放入去食。肉末味道不錯，不過唔係好食到有炸菜，反而芹菜味更搶。略嫌炒饅頭太油，食落去好大陣油味。