閨•家 (美基樓) (已結業)

今日收工入咗屯門搵朋友食飯，佢話淨係見到呢間舖頭都排長龍，可以試吓。感覺上唔茶餐廳類型嘅街坊食堂，大裝修就感覺比較年輕啲。就咁睇佢呢度應該主打湯水，每一晚都有唔同嘅湯，只要嗌飯餐就跟個細湯，但其實就咁買個大湯都只係$28。今晚嘅係五指毛桃淮山煲雞，睇落都好足料，而且飲落都冇味精。我哋試咗佢個招牌豬扒蓮藕餅飯，佢個豬扒真係醃到好入味，肉質都好腍。而蓮藕餅就唔係爽彈嘅口感，比較林身少少。另外我哋仲揀咗個醉雞麵，佢嘅醉雞係有骨嘅，不過就會俾咗一隻雞脾，肉質比較實，但係就唔夠醉。而佢嘅麵唔係普通嘅麵，而係甘筍面，所以味道好香。原本想試佢個紫薯面或者波菜麵，但係通通都已經賣晒，但係呢個甘筍面色落都有驚喜，因為佢麵嘅本身帶有點點甜味。另外我哋額外叫咗個手撕雞做小食，佢呢度嘅手撕雞係用麻醬撈，略嫌佢唔係好夠味，不過如果對口味清淡啲嘅人嚟講應該都唔差。佢呢度嘅嘢全部都冇落味精，而且價錢實惠，以飲湯來講性價比真係幾高。