Chatterbox Express

營業中

休息中

約左朋友嚟太古食晚飯，朋友推介之下就嚟試下呢間新加玻菜。文華海南雞飯雞皮好滑，肉質非常鮮嫩，亦無多餘既碎骨。米飯充滿雞油香，粒粒分明，唔會好重油膩感。特別鐘意個秘製既黑豉油，味道好濃郁。新加坡肉骨茶麵線有豬骨、蒜頭、豆卜，仲有另上既油炸鬼。湯底既胡椒味好重，好似飲緊胡椒豬肚湯咁；豬骨肉質偏淋，份量都唔少；麵線則十分掛湯，成碗麵都做得好出色。黑醬油炒蘿蔔糕本色見到蘿蔔糕咁深色以為會好濃味，點知食落又唔係想像中油膩感咁重，反而帶點點甜味之餘亦Keep到蘿蔔糕本身既味道。蠔油小棠菜跟餐加$15就有碟清清地既菜，蠔油唔會加得太重同太鹹，都幾值得一試。椰子雪糕咖央三文治每件三文治既其中一片麵包都搽滿咖央醬，再加啲椰子雪糕一齊食，真係一流。凍美祿恐龍上面除左有美祿粉之外，仲有埋美祿波波，夠哂甜又夠哂邪惡。