龍城冰室

營業中

休息中

喺觀塘放工，同事話屋企冇飯食，諗住同佢食個快嘅晚餐。平時都有食開龍門冰室嘅早餐，質素唔錯，一於試吓晚餐係點。餐牌嘅選擇好多，焗飯、小菜、西餐、鐵板等一應俱全，選擇十分多樣化。而見佢一直都有做開二人小菜套餐，兩個小菜加兩個白飯加兩個湯，只係$149。菜式方面有近40個選擇，而且有好多海鮮餸菜例如龍躉，帶子，花甲等等，冰室來講確係有啲驚喜。我哋二人叫咗菜心炒龍躉球同西蘭花帶子，兩個份量都係大大碟，魚同帶子都10分足料。西蘭花炒帶子帶子都夠彈牙，而且配料十足，呢個價錢呢個質素，係冰室嘅環境，性價比算好高。菜心炒龍躉球龍躉當然唔係貴價龍躉，但鑊氣夠 炒得香口。湯方面，有中湯，白湯同紅湯，我哋分別叫咗白湯同紅湯，係正常茶餐廳味道不過不失。另外再叫多杯熱朱古力當係飯後小甜品。