牛屋餐廳

營業中

休息中

今日約咗個朋友收工食飯，因為要去一轉尖沙咀先，朋友就推薦食牛屋。由尖沙咀行到佐敦，貌似好遠距離，其實15分鐘左右行到，地點非常方便。舖頭無論門面定內裏裝修都非常有氣氛，好有以前舊式扒房嘅感覺。我哋食20:30，入坐率都有8成。門口餐牌大概就係晚餐主打。我同朋友都叫咗精選套餐裏面嘅紐西蘭牛柳，佢5成我7成，而所有套餐都包餐包餐湯同野飲。餐包上枱仲熱嘅，已經幫你搽埋牛油，走油嘅朋友要注意！餐湯都係紅白兩款，我地都揀紅湯，味道不過不失，但份量都大碗。主菜方面，牛柳有手掌咁大亦都非常厚，即使咁厚都做到5同7成嘅分別(朋友個塊明顯紅啲），雖然好基本，但宜家好多餐廳都做唔到，所以值得一讚！其次係就算我叫7成都唔會太韌，好易切！而伴碟嘅薯條份量亦非常足夠，普通女仔一定會勁飽！埋單每人$196，坐足兩個鐘，無人吹無人趕，美中不足嘅係無鐡板，但食物高質，氣氛一流，可以encore。