戀 (太子集團中心) (已結業)

吃貨人生，無論咩時侯都需要食。見太耐冇食日菜，同朋友黎尖沙咀食日本菜。兩個人叫得好豐盛。串燒、壽司、天婦羅、丼，咩都有。串燒六式拼盤可選擇汁燒或鹽燒，選擇咗汁燒，因為鐘意甜甜地嘅燒汁。拼盤好豐富， 一般嘅牛肉、雞肉都好嫩滑。當中最愛厚燒牛舌同五花荔枝肉。牛舌外少脆內軟，口感極佳。五花荔枝肉一咬落肉脂爆曬出嚟，之後慢慢食到荔枝果甜。一邊食仲有個小火爐比我地燒一燒串燒，作翻熱。特選壽司三式拼盤有三文魚、吞拿魚同甜蝦。當中最愛食厚切三文魚腩，極肥美。海老天婦羅有4隻大大炸海蝦，薄薄炸粉包住彈牙海蝦，保留咗天然蝦味。食丼嘅話要選擇海膽三文魚丼。海膽足足有3片，好鮮甜，配埋三文魚子食，拌成碗飯唔成問題。三文魚都有5片，但冇壽司嘅三文魚咁有魚油。朋友比較少食茶漬飯，所以點咗燒三文魚茶漬飯一齊食。高湯有好香濃，用鰹魚作主調，配以淡淡紫菜咸味。朋友都好鐘意呢個食法。隆重開業有非酒精飲品買一送一，點咗冷泡荔枝紅茶同荔枝藍蝶花梳打。最後點咗紅豆抹茶奶凍同楓糖鮮果窩夫作結。