MGB by Manhattan Grill & Bar (已結業)

好少機會去啲高級食肆，難得今晚有人請客一於滿足吓啲虛榮先！MGB 最啱三兩知己，兩小無猜撐枱腳 因為佢店內燈光柔和，環境氣氛令人非常 relax，食品份量輕巧精緻，令人食慾大增 等我介紹下……前菜 - 蕃茄蒜蓉包 - 蕃茄用橄欖油醃過配上脆卜卜嘅蒜蓉包，酸甜鹹香，一入口就口水大爆發！大蝦牛油果沙律（芒果汁） - 芒果香甜，大蝦爽口，牛油果 creamy，生菜爽脆。味道獨立得嚟又可以融合得好好，簡直係夢幻沙律！水牛城辣雞翼 - 脆炸雞翼外層蘸滿特製醬汁，香、辣、甜味道層次分明，又一次刺激味蕾 主食 - 美國威靈頓牛柳 - 係我朝思暮想嘅菜式牛柳完美煎封，鎖住肉汁，外層包住蘑菇醬，再包一層酥皮，焗至半熟。真係少啲心機少啲技巧都唔得架！鮮蝦帶子卡邦尼扁意粉 - 鮮蝦、鮮帶子，配卡邦尼忌廉汁扁意粉！海鮮嘅鮮味，濃郁嘅奶油味，我而家仲回味緊 甜品 - 特濃朱古力心太軟配草莓雪糕 - 香濃嘅朱古力蛋糕入面，注滿特濃黑朱古力漿，配香甜嘅士多啤梨雪糕，味道配合完美。生日嘅話仲可以响碟上寫祝福句，雖然老土，但超窩心充滿歡樂嘅氣氛，高品質嘅美食，造就完美嘅晚餐！推介！推介！推介！