鮨見 (已結業)

好耐冇寫過食評。但今日太過震驚，實在要抒發下，令其他食客引以為鑒。今日中午同朋友黎食壽司。環境首先一入去，個裝潢已經唔妥，中午時間都覺得昏暗，有種殘舊感。睇得出想向日式家居裝潢靠攏，但格局出奇地違和。衞生menu係就咁一張紙，上面有豉油漬。有一張維达濕紙巾，日式壽司店枱上出現一張有簡體字嘅內地品牌濕紙巾，有啲突兀。其實喱刻想走，但坐低左又唔好意思。加上見佢滿座，姑且一試。師傅主要講英文，普通話加少量日文。食物蒸蛋淡而無味，只有少量菌類同迷你瑤柱。8件壽司，有4件比較正常。第一件舊魚有筋第二件有骨第四件超級腥，就算有薑蓉都掩蓋唔住陣味，灌左幾啖茶先忍到唔吐出黎。食完喱件已經令我對壽司有陰影。海膽壽司用左酸汁，古怪，又掩蓋左海膽嘅鮮甜味。其餘4件冇以上問題，我好感恩。最後個魚湯同豆腐雪糕係成餐最優質嘅食物。賣單每人470幾，咁嘅價錢，我情願食元氣。咁嘅價錢，灣仔，銅鑼灣，有太多質素高嘅選擇。無論環境，食物質素，服務態度都遠遠超過喱間主打omakase, 高級壽司嘅餐廳。喱個世界有好多野都解釋唔到，例如點解喱間餐廳有咁多好評。