麻辣串串香 (已結業)

端午節前夕當然要約朋友去食野啦，聯和墟不嬲都多野食，今次就決定食串燒飲啤酒，麻甩下呢間係食麻辣串燒，不過其實都有得揀唔辣，另外仲有酸辣粉、麻辣燙食，真心推薦，我覺得好好味蒜香焗沙白-每隻都脹卜卜，個底鋪滿粉絲，粉絲索晒啲汁好正；燒茄子 -食串燒必點，蔥蒜鋪滿面好惹味；燒羊架 -師傅燒得啱啱好，好juicy肉好嫩；燒大扇貝-夠大隻，好鮮味多汁；燒秋葵-第一次咁樣食秋葵，燒過既秋葵好香，面頭灑左啲辣粉，好惹味，原來用燒既都幾好食；秋刀蘆筍卷-呢個必點，極力推薦，秋刀魚好嫩滑juicy，蘆筍中和左啲魚油，唔油膩好好味；通菜-呢個又係必點，好惹味，菜葉索晒啲汁，好好味，有驚喜；牛肋骨串-肉質好嫩，唔會死實實；芝士蘑菇串-一串三粒，每粒都有芝士鋪面，食落口仲係好juicy，唔會燒到乾晒；燒雞全翼-燒得好靚，外皮燒到金黃色，好香口；日本一口蕃薯-一串三粒，食落口質地好creamy，做甜品一流！本身都想食酸辣粉，不過淨食串燒同飲啤酒都已經飽左，唯有下次先再食啦！總括黎講，食物質素真係唔錯，店舖職員亦友善同有禮貌，另外值得一讚既係，啲啤酒杯係放喺雪櫃度雪住，所以啤酒係keep住凍，呢點真係好細心！