喜記蟹將軍 (iSQUARE國際廣場) (已搬遷) 新店位置

琴日係男朋友生日，知佢鍾意食海鮮所以訂左喺國際廣場嘅喜記蟹將軍同佢慶祝，見到佢時令奄仔蟹套餐，所以提早一日訂咗。啲職員都有禮貌，又會安排口罩信封俾我哋放口罩，衛生得來又窩心。枱面有好多俾我哋剝蟹嘅工具，所以都唔會麻煩。首先有蟹肉扒時蔬🥦，我哋嗰日係西蘭花，啲蟹肉味道好濃郁，有啲汁浸入西蘭花入面令到食落去嘅時候好滿足。仲有百味豆腐，呢個少少似避風塘炒豆腐，豆腐外皮酥脆，加埋香料好惹味。主食有蟹粉燴飯，飯桶男朋友見到呢個雙眼發光，炒飯底加埋滿滿蟹粉真係食到停唔到。最後當然唔少得奄仔蟹，有清蒸嘅同埋牛油鹽焗，可以試兩種味道各兩隻，一款比較鮮甜，另一款就有鹹香，蟹都好新鮮。🦀