亞金南洋茶室 (黃大仙中心南館)

營業中

休息中

不嬲都鍾意食東南亞菜，尤其鍾意食星加坡同馬來西亞菜。呢度個招牌喇沙，湯底好有椰香味，夠晒濃郁，有少少辣。配料又夠多，有蝦、蟹棒、魚片頭、豆卜等。最正係面底可以揀滲滲，即係一次過可以食晒油面同米粉，啲面索晒湯底d椰香味，超級惹味，食到最尾，真係連湯底都飲埋。除咗喇沙之外，肉骨茶都係好推介，用一個砂鍋上，有2人份量，配2碗白飯同一條油條，肉骨茶藥材味夠，入面嘅材料超級豐富，一字骨、豬肚、豬手、腩肉、雞腳，啲肉全部都好入味，煮得夠腍，個湯底真係好好飲，如果可以再多啲湯就好啦。我哋仲叫咗幾個小食，蝦餅厚度適中，肉質彈牙，個皮又炸得夠脆。而鮮牛油咖央多士，多士啱啱烘起，熱辣辣，脆卜卜，咖央唔會太甜，味道啱啱好，再加埋超厚嘅牛油，一食落口入口即溶，真係好想encore！呢度仲有個幾特別嘅玻璃魷魚通菜，啲魷魚好彈牙，通菜夠新鮮，唔會好老，碟通菜用咗秘製嘅醬汁去炒，好惹味！