微笑韓國料理 (已結業)

有啲掛住韓式辣味因為好耐冇食，所以今晚就約朋友食韓國嘢，環境好有復古宮廷既感覺，用左傳統木製同類似如意結既做裝飾，而且每張枱空間感好大，十分舒適。餐廳前菜有酸蘿蔔同泡菜，以及豉油滑豆腐，泡菜好好味！辣到好過癮好刺激🤣個豆腐都好醒胃，朋友本身唔中意食豆腐，但佢個豉油甜甜地，搭配埋香葱同木魚，有種清香既味道，結果朋友都食得好滋味😹主菜當然唔少得炒年糕紫菜粉絲卷啦，大大碗有大量年糕，軟硬度煮得啱啱好煙煙韌韌，唔會淋到一pat野，仲有青口同雜菜撈拌而成，因此有少少海鮮甜味，紫菜卷炸成香脆，粉絲滑嫩，連埋韓式辣醬湯一齊食，正呀！我就揀左金槍魚蓋飯，由新鮮吞拿魚粒、青瓜、沙律菜、麻油紫菜、韓式辣醬全部搞勻食，味道好fresh好好味，平時食開日式既吞拿魚飯，今次韓國版原來都好好食，唔撈豉油撈辣醬，讚👍