吞POT 雞煲火鍋.住家菜 (山林道) (已結業)

之前我食過幾次吞pot都幾滿意，今次第一次黎尖沙咀分店，一樣咁滿意！首先，當然要揀重慶麻辣雞煲，兩個人揀半隻雞就啱啱好，試到雞之餘，仲有胃口食多啲其他餸。我地兩個都係想食辣，但唔太食得辣，BB辣就啱曬我地～雞肉全部都好香，微辣，好惹味，而且口感好嫩滑，好好食！食完雞煲當然唔可以漏左打邊爐既環節，要試多幾款火鍋料。牛柳粒半肥半瘦，油脂豐厚，肉質彈牙。羊肉片肥瘦適中，肉質嫩滑，羊味濃，但又唔會太騷。自製爆芝響鈴自家製產品真係必點！係新鮮炸起既，非常之脆！煮左一陣後，響鈴吸收到湯底之餘，仲可以食到流心芝士餡，好正！作為芝士控既我，真係好滿意，如果可以再多啲芝士就當然會更好～