泰紅泰國美食 (已結業)

今日因為有要事做攪到兩點幾都未食晏,終於2:40pm行過Red Thai嘅門口。問吓有無下午茶時段,女侍應回答"無,但仍然可以盡快2:45pm前order set lunch"。結果一行人抱住試吓嘅心情入咗去,搵咗靠近門口一張大圓型嘅梳化位坐。趕緊叫咗幾個set lunch加一客炸蝦餅俾小朋友食。海南雞飯上檯賣相唔錯,食落香滑有雞味。咖喱牛腩味道適中,唔會太多椰奶及一味死辣。驚喜係泰式鹵水豬手飯,上檯嘅賣相出奇地整齊排放,入口香清細膩輪到至愛嘅"馬拉沙咖喱羊膝配油酥餅"。本來羊膝嘅味道唔錯,分量十足。但係可能因為時近3:00,印度師傅做到過晒鐘,出菜斷晒纜。等咗差不多十分鐘後酥餅先到,胃口大打折扣最後大家覺得味道唔錯,決定試埋推介嘅甜品"馬來花生脆雪山"。由於望到印度師傅舉起三隻手指好似表示三點鐘重未收得工,我哋恐防咁遲加單會唔會失水準呢好彩依落都算交到貨,但都嫌價錢貴咗啲