言居酒屋 (已結業)

辛苦左一個星期，星期六夜晚梗係食好啲同埋玩夜啲啦，去咗呢間都算隱世嘅小店居酒屋。細細間，啱晒同朋友傾計，唔怕太嘈。因為揸車嘅關係，所以冇叫酒嚟飲。醬油湯底叉燒拉麵先飲一啖湯，湯底鮮甜，好香醬油味。叉燒都好好味，入口即溶。而麵嘅質地都好煙韌，軟硬度適中。吉列豬扒日式咖喱飯豬扒炸嘅程度啱啱好，而且豬扒唔會太乾或者太硬，有少少脂肪，所以整體好好味。咖喱都好香濃，入面有好多蘑菇，有少少甜，蘸吉列豬扒一齊食係perfect match。燒墨魚餅塊皮烤到脆脆地，香噴噴。第一舊食覺得好香墨魚味，亦都好彈牙。朋友同我講上面有啲薑蓉，夾埋一齊食會將成個鮮味提升。當我再食嘅時候，就加咗啲薑蓉，味道真係唔同，墨魚嘅鮮味立即大大提升，好有驚喜！年糕豚肉串燒豚肉又係烤到有啲脆脆，薄薄嘅一片豚肉包著煙韌嘅年糕，又係意想不到嘅好味，因為年糕真係特別煙韌，豚肉嘅陪襯令到年糕唔會太膩。海蝦天婦羅天婦羅水準唔錯，炸粉唔會過厚，份量都唔少，啱晒送酒。如果想搵個地方同朋友飲下酒傾吓計，呢度就啱晒啦。