金田家 (已結業)

呢間拉麵想食好耐， 次次都大排長龍。 今日 閒日放假， 下午茶時段竟然冇乜人排隊，梗係親呢個機會去食下啦!拉麵餐廳嚟講都算闊落和開揚， 環境唔錯，感覺休閒舒適。柚子辛口拉麵輕輕既柚子味，感覺幾清新特別。拉麵煙韌之餘夠晒彈牙，豚肉出奇地無雪藏味， 而且仲好大片，份量都算多。 紫菜新鮮脆口， 湯底夠濃郁而且仲好香豬骨味，當中帶些少辣，感覺好惹味。餃子即叫即煎，外脆內軟， 食完碗拉麵再食 四隻餃子，真係好飽肚。再飲埋杯蘋果汁，真係好滿足。餐牌簡而精，拉麵軟硬程度和蔥多與少，都可以自由選擇，感覺彈性仲好似為你度身訂做咁。