新三興茶餐廳 (已結業)

新三興呢間老店，但我和少奶在近幾才開始光顧。除了有時會在午市食炒粉麵，我地都會黎食早餐。不過這裏的即食麵通常會煮得太淋，所以唔係我地杯茶。平時在這裏吃早餐最愛腸粉，尤其係豬膶腸和蝦腸，連熱飲都係$16。蝦腸有時係預先造好的，粉皮會較硬，蝦也相信是雪藏貨，但夠大隻而且好爽口。豬膶腸就必定係即拉的，所以要等耐d，但上枱時熱辣辣，豬膶也很爽口，剛剛熟，不會生也不會太老。講真，响我地心目中，呢度d腸粉好食過好多酒樓。呢度仲有個奇景，有時晚市時段，有人會食食下碟頭飯，突然慶起就叫多碟腸粉食下。不過，早市和晚市的腸粉可能由不同人拉製，水準也有一點分別。早市由粥的阿姐負責，水準較佳，而且售完即止，有時晏左去就無得食。晚市則由廚房負責，有時粉皮的厚薄和軟硬較飄忽。但整體而言，還是不錯的。呢度老店d伙計都係中年以上，但好有人情味，不時同客人打牙骹。有次有位小朋友要飲凍朱古力，餐牌上無，伙計叔叔就話不如飲凍華田啦，見小朋友有點猶豫，伙計就話凍華田係凍朱古力既阿哥黎架，咁就攪掂左啦，我同少奶地坐响隔離笑曝咀除左食物，我地就係鍾意呢份人情味。