添記燒臘茶餐廳 (已結業)

一盅飯，兩碟點心，再加一盅茶，三十大洋，抵...環境及人都係地踎到極，全部客都係年過四五十嘅師奶同阿伯，全場最後生又係我唔知點解極之愛到呢D草根到極嘅食肆。嘢食平過人當然係其一原因，但我諗，嗰種平民草根味先至係最大嘅吸引力...裝修得富麗堂皇嘅餐廳，食到週身唔聚財，唔啱我...講番嘢食。叫一盅鳳爪排骨，飯有點濕，夠色，排骨肥瘦有致，豉油偏甜。整體上不太差，水準當然不及大埔林記及土記嘅明珍好..見有春蛋燒賣，機不可失，即叫。三大件，下層嘅啄碎豬肉份量十足，食完後肚子感覺好充實，好飽肚，加埋上面嘅春蛋，真係飽上加飽。但面對如此美食，飽? 膽固醇? 早已拋諸腦後...見到不停有山竹牛肉出爐，好吸引，忍唔住再叫埋。又係斤両十足，雖食唔出陳皮味，但口感未致於完全淰pat pat，總算食得過...八卦，睇到隔籬叫嘅义雞飯，飯堆到好似小山丘咁，面上再舖上晶瑩欲滴嘅半肥瘦义，差D又想叫埋...咁點攪? 嚟個food marathon好唔好?