大師兄 (已結業)

好鍾意食點心，但係唔係好鍾意去茶樓，所以差不多每逢週末我都會去食大師兄。不過最近由於疫情，佢淨係改咗做外賣，冇堂食所以我都少食咗。點心質素係唔錯嘅，不過就一時時，有時人多都會炒車，所以最好少人啲嘅時候先食。例如我試過潮州粉果係夾唔起，一夾就成舊爛咗，一pat野咁好恐怖。環境來講就係好擠迫嘅小店，服務都唔好要求有啲咩，基本上就係家庭式營運，不過呢啲來講我都唔係好執着，最緊要係食物。蝦餃王和燒賣王兩件裝各$18，兩個人食啱啱好，推薦！腸粉都滑嘅，隻隻都唔錯，個人比較鍾意食叉燒腸同埋蝦腸。滋潤紅棗糕$16三件，香甜軟糯。鹹水角外脆內軟煙煙韌韌，$18三件。蒜蓉蝦春卷$20三條，新鮮出爐非常香脆，入邊隻蝦仲要好大隻。馬拉糕$16，呢一款就一時時，有時好好食有時唔好食。避風塘炒蘿蔔糕，少少辣，脆，好惹味！茶剩係得兩款，我通常都係飲普洱，佢啲茶唔好飲，叫做好過飲水。整體來講食得過，性價比極高！平視我兩個人食大概點六至七款點心，埋單$120-130。