金記客棧 (已結業)

今日難得朋友約我去數碼港睇戲，順便入去行下草地。竟然咁啱得咁橋戲院隔離又係金記品牌，數碼港呢間名為客棧，唔係冰室。呢間多左個燒味部同埋有避風塘系列，但其實冰室嘅野都有提供。Menu唔再玩乒乓波拍而係美味秘笈，可惜嘅係因為時間太早，試唔到避風塘海鮮，要試只能食晚餐了。黎金記當然都係唔少得紅豆冰，紅豆大大粒，奶味重，雖然肥到爆，但炎炎夏日，肥就肥啦。叫左個椒鹽九肚魚，炸得好鬆脆，鹹味啱啱好，魚肉嫩，份量都足架！仲有個燒鴨，上碟好似貴價酒樓咁，碟底有蠟燭仔熱住，值得讚下，味道方面都正，有汁唔會太難咬，估唔到做開冰室都可以做到酒樓燒味水準，例牌都大大碟。可惜要趕住去睇戲，其實環境真係好好坐。希望下次有機會試到海鮮啦，不過數碼港真心有點遠呢！