Irina (已結業)

我係去太古城中心果間。不過OR好似無呢間餐廳，就寫住響度先。話說好姊妹生日，想買個靚啲既蛋糕，就試下呢間新野。六個人食，就揀左三層十二件果款。承惠三百八十八，算係中價蛋糕。佢有得自選十二種味，花多眼亂，亦都終於唔洗擔心邊個鍾意乜味，唔鍾意乜味。見到盒蛋糕哇一聲，都真係幾靚。另一個哇係都幾難拎出黎，佢個頂粒生果係痴住個盒，基本上好易整到。同佢既生日牌係分開上，要自行搞掂。不過真係好靚，一拎出黎所以姊妹都話好特別。仲可以好多味大家開心互試。十二款味唔逐款講，重點講幾隻印象深刻啲既。開心果 - 好香開心果味，好正，推介！杏仁豆腐 - 係杏霜味，好多人未必會鍾意，不過我覺得幾特別同好味！甜醬油 - 未去到好正，不過幾搞笑幾特別，甜甜地不過又食得出少少豉油個feel。其他啲咩抹茶，芝麻，tiramisu，咖啡等等野都好味，不過係好大路做到既野啦。總括黎講係一百分靚同二百份好玩既蛋糕！