韓舍 (已結業)

「千里之堤 潰於蟻穴」見呢間餐廳咁多人吹捧，便打算同家人嚟試吓，早幾日已特地打嚟訂位 6:30，電話上講明 10 分鐘留位。當日 6:37 到達，去到台前個帶位女店員黑面噉寸我話 「遲咗少少喎小姐」，當下真係以為自己遲大到，點知睇返其實都係遲咗幾分鐘咋喎。估唔到呢度嘅服務態度咁差，成餐飯都未開始食，已經俾呢一句毀了。入座後周圍望吓，原來都只有七成滿，尚有唔少空位。座位就幾舒服嘅，大大張梳化椅，給予足夠嘅位置擺放食物。食物款式都唔少，有沙律、生食、熟食、魚生、甜品等等，但多又點啫？味道都係平平無奇，唔見出色。作為韓燒嘅主打-肉類，肉質更加比其他更平嘅韓燒差。仲可以 diy 章魚小丸子、炒雪糕等，但玩吓就好了，冇見過人成功整到。只可以講如果一間餐廳嘅服務差劣，儘管食物有幾豐富，水準有幾高都係無補於事。何況呢間餐廳都只係重量不重質，水準都談不上高吧。真失望。