Rimi Cafe (已結業)

收工冇野搞想去掃街，食左幾間唔夠飽，就係附近想搵間餐廳食番個晚餐。可惜登打士街成條街都係cafe。一向都唔好cafe，因為主要都係啲靚仔靚妹上去打牌，食物通常都伏。不過為左醫肚，見到呢間有大大塊燒豬肋骨食，作為食肉獸，好吸引，就揀左呢間。呢間野有兩個單位，我張枱就去左細啲果邊，但係都好啊無咁嘈，又無咁多人。我同朋友兩個人，叫左燒豬肋骨配薯菜加$38可以有埋餐湯+蒜蓉包+飲品+是日蛋糕，好似好抵食。兩個人食完唔夠飽，所以另外仲叫左個煙三文魚薄餅。BBQ燒豬肋骨幾好食，果然無失望。醬汁調得唔錯，豬肉燒得夠離骨，容易咬，配既沙律、薯菜同紅蘿蔔仔都好好食。煙三文魚薄餅夠厚身，夠曬飽肚。餐湯係蘑菇湯，足料，唔會全部都係水。蛋糕係朱古力蛋糕，好有可可味，唔會一味甜。原來樓上cafe食物都可以咁高質，令我對cafe改觀。