影片
更多
2021-08-16
363 瀏覽
【一盅點心】 #長沙灣 #點心今日同咗個好耐冇見嘅打工仔朋友出嚟食飯，難得可以見面，梗係想搵個可以坐耐啲嘅地方，於是興致勃勃咁去咗呢間一盅點心飲茶食點心。六拼燒賣組合（$68）賣相味道都一流。六款口味，總有一款啱你心水——爆汁墨魚（龍蝦汁）、家鄉糯米、乾蒸牛肉、白雪帶子、鮑魚、懷舊燒賣——總共六款，每舊都爽口彈牙，飽滿多汁，連個竹籠都係用特大號，可見每粒燒賣都具備一定份量。估唔到連鮑魚帶子都係真材實料，六粒各有特色而且味道令人驚艷嘅特色燒賣居然只係買呢個價錢，真係極之抵食。黑松露山珍腐皮卷（$35）腐皮卷炸得相當香脆，每啖咬落口感脆卜卜，而且餡料亦十分豐富，加咗好多山珍野菌，令到呢碟腐皮卷嘅口感充滿柔軟以及香脆相互交錯嘅層次感。原籠馬拉糕（$23）馬拉糕相當大份，脹卜卜，而且相當鬆軟。撳落去半秒內就識得自己彈返去原狀，彈性完勝唔少市面上抗壓能力堪憂嘅港孩級淋到爆糕點。呢籠馬拉糕我比十個讚。香茜馬蹄牛肉腸（$28）粉腸皮口感帶點嚼勁，牛肉滑夠碎夠稔，甚至令人諗起食吞拿魚蓉嗰種要斷唔斷、藕斷絲連嘅連綿。係一碟食得出一份溫柔嘅腸粉。鳳爪排骨飯（$40）不容小覷嘅一籠飯。佢雖則只係一籠飯，但佢
今日同咗個好耐冇見嘅打工仔朋友出嚟食飯，難得可以見面，梗係想搵個可以坐耐啲嘅地方，於是興致勃勃咁去咗呢間一盅點心飲茶食點心。
六拼燒賣組合（$68）
賣相味道都一流。六款口味，總有一款啱你心水——爆汁墨魚（龍蝦汁）、家鄉糯米、乾蒸牛肉、白雪帶子、鮑魚、懷舊燒賣——總共六款，每舊都爽口彈牙，飽滿多汁，連個竹籠都係用特大號，可見每粒燒賣都具備一定份量。估唔到連鮑魚帶子都係真材實料，六粒各有特色而且味道令人驚艷嘅特色燒賣居然只係買呢個價錢，真係極之抵食。
黑松露山珍腐皮卷（$35）
腐皮卷炸得相當香脆，每啖咬落口感脆卜卜，而且餡料亦十分豐富，加咗好多山珍野菌，令到呢碟腐皮卷嘅口感充滿柔軟以及香脆相互交錯嘅層次感。
原籠馬拉糕（$23）
馬拉糕相當大份，脹卜卜，而且相當鬆軟。撳落去半秒內就識得自己彈返去原狀，彈性完勝唔少市面上抗壓能力堪憂嘅港孩級淋到爆糕點。呢籠馬拉糕我比十個讚。
香茜馬蹄牛肉腸（$28）
粉腸皮口感帶點嚼勁，牛肉滑夠碎夠稔，甚至令人諗起食吞拿魚蓉嗰種要斷唔斷、藕斷絲連嘅連綿。係一碟食得出一份溫柔嘅腸粉。
鳳爪排骨飯（$40）
不容小覷嘅一籠飯。佢雖則只係一籠飯，但佢準確啲嚟講係可以令你滿足到上心口嘅一籠鳳爪排骨飯。有時想食下鳳爪但係又唔想叫一大籠，驚食到厭，呢籠鳳爪排骨飯都有幾塊大大條嘅鳳爪，可以一圓你嘅口癮，同時間又有更多更飽肚嘅排骨，嫩滑而且軟韌，好嚼又好食。想講呢籠飯嘅味道真係幾唔錯，尤其大食鬼必點！
茶芥（$4／人）
香片茶香濃郁。值得一讚嘅仲有服務態度，完勝唔少所謂高級嘅「西」餐廳。侍應哥哥觀察入微，見到我哋飲曬茶就主動過嚟添水，順手幫我哋斟埋茶，咁嘅服務質素直頭五星級啦。
真心呢間餐廳好好，不論食物不論服務都上得檯面。要講缺點，只可以話係店面裝潢唔夠「高級」同時又唔夠「傳統」，不然佢如果份量減一半，價錢提高兩三倍，吊高嚟賣，應該就會多好多人排隊幫襯（真心戥佢覺得可惜😢）
———————————————
#一盅點心
一盅點心 (長沙灣)
長沙灣青山道152號地舖
張貼
