十三少 (已結業)

宜家天氣凍凍地，好啱食辣嘢。十三少一向有幫襯開，想食辣嘢咁就揀佢啦。一坐低，即刻送上一碗炸黃豆，黃豆炸得好酥脆，一粒接一粒嘅食到停唔落口。前菜揀咗涼拌土豆絲，土豆絲切得大小好均勻，食落好爽脆，醬汁酸酸辣辣好開胃，兩啖已經食哂，作為開胃前菜黎講啱啱好。幹煸四季豆，哩碟炒得好有水準，四季豆炒到好幹身，食落好脆口同埋夠曬鑊氣，會有少少辣味，不過唔會太辣，成碟夠曬惹味。水煮魚好大一份，配料好豐富，有魚肉，豆芽，青瓜同埋寬粉。魚肉揀咗鱸魚來製作，好幼滑同埋無骨。魚湯係用魚骨煲制，成份魚雖然係麻辣味，但都飲得出湯嘅鮮甜味。配料份量都幾多下，寬粉差唔多裝咗兩小碗，青瓜同寬粉嗦哂湯汁麻辣味道，食落有少少麻辣勁好味，好似食咁酸辣粉，賺咗TIM。水煮魚睇落好似好辣咁，食落唔會覺得好辣，對於我黎講都係小麻小辣。成份魚肉食完，再食完配菜，勁飽。雖然唔算辣，食完都出哂汗，唔得返內地食水煮魚，十三少啲水煮魚又真係唔錯！