泰國佬餐廳 (已結業)

家姐有朋友介紹咗呢間泰國餐廳俾我地，所以我地一家就搵咗晚嚟咗呢度食。呢間「泰國佬」位於廣福道馬路旁，好易搵。入面播住泰文歌同埋簡簡單單嘅裝潢好有泰國嘅風味。小編覺得呢度嘅泰菜幾適合香港人嘅口味，因為佢嘅辣度可以話啱啱好，有少少辣吊味又唔會辣得濟而食到出曬汗。我地今次叫嘅嘢食大部份都係單點嘅，因為淨係得小編想飲嘢，所以海南雞飯就係跟餐咁嗌嘅。佢地嘅四人餐感覺無特別抵，只係有四杯野飲，而菜式都無得自選，所以我地就主要都係散嗌為主。我地嗌嘅菜式大部份都係好食又高質嘅，要特別介紹佢地嘅蒜蓉多士，雖然造型好似成舊磚頭咁，但係食落去外脆內軟，就咁食可以食到佢嘅蒜香同脆口嘅感覺，仲可以蘸青咖喱汁，一樣咁夾。串燒稍微有啲過熟，少韌，有啲可惜。不過整體而言，四個人食都係六百幾蚊，都幾抵食嘅，大家可以叫少啲，好似我地咁樣眼闊肚窄會飽得濟。