海港燒鵝海鮮酒家 (已結業)

早幾日同朋友聚舊，出旺角打邊爐，願本諗住去稻香，但朋友話要去金雞廣場間海港，皆因佢幫襯開荃灣o個間，覺得又抵食又好食，所以一齊試試旺角新店。其中一人要八點幾先到，所以我地食九點特價火鍋，由於早攞飛，裡面又有枱，職員八點九就俾我地入去。我一攞起手就諗住剔鴛鴦鍋，好彩朋友制止住我，原來每晚特價時段都有兩款$1湯底，我地揀o左冬瓜豬骨湯，另外火鍋配料大部份都係$12，我地要o左：水餃拼雲吞、蝦丸拼墨丸、金菇、本地肥牛、魚腐、鮮支竹(仲有一樣唔記得)，再加兩碟$18o既帶子片同花膠筒，另外見枱枱都有燒鵝，梗係要碟例牌再加碟燒肉，終於四個人就叫o左九碟火鍋配料加兩碟燒味喇，大部份o既食物都唔錯，其中以$12蚊一碟o既手打蝦丸拼墨丸最抵食，花膠筒o係出面好少見，最o岩女士養顏，招牌貨燒鵝亦有水準。四個人冇特別嗌o野飲，飽到食淨o野，都係位位$70，唔怪得全場爆滿，真係抵食。