Hungry Korean (蘭桂坊) (已結業)

今日喺中環開會，會議完成後見到時間尚早，就去老蘭嗰邊揾食。見到Hungry Korean開咗分店，而且居然未有人排隊，即刻撲埋去攞位。入座後15分鐘，已經坐到爆晒。午餐大約$60左右，可以食到泡菜炒豬肉、辣炒雞、炒牛肉，仲可以加飲品，喺中環應該係超級抵食。入面當然係坐得比較迫澀，今次坐到面壁位，冇咁易比人唔小心撞到。叫咗個韓式鐵板炒豬肉。坐低前後唔使10分鐘，熱辣辣嘅午餐就送到嚟。除咗泡菜同豬肉外，入面亦落咗香口嘅洋蔥同椰菜。豬肉係半肥瘦，啲豬油係鐵板嘅熱力下同啲配料水乳交融，送飯一流。