逸東軒

營業中

休息中

上月《香港澳門米芝蓮指南2024》名單出爐，當中不乏五星級酒店高價位餐廳，想經濟一啲品嚐榮獲米芝蓮殊榮嘅餐廳，逸東軒確實係不二之選。逸東軒位於逸東酒店B2，由地面行兩層較狹窄嘅樓梯，感覺隱蔽。餐廳裝橫古色古香，枱與枱之間非常闊落，同一般中菜廳狹窄擁擠嘅佈局大相逕庭，環境舒適愜意，好適合同親戚朋友茶聚。點心款式同普通茶樓大同小異，不過逸東軒嘅點心食材比較新派，菜名都冇咁刻板。今次我哋兩個人一共點咗5碟點心同甜品。第一碟點心係香麻叉燒酥。呢碟看似普通，但我哋兩人一致認為係五碟之中最好食。叉燒酥外皮酥脆可口，叉燒肉質鮮嫩多汁，蜜汁醬香味四溢，口感有嚼勁，係必點之選。平時食燒賣都係食魚肉燒賣多，今次就點咗籠帶子蒸燒賣。原粒帶子配燒賣冇違和感，帶子望落好有光澤，食落新鮮又爽口。之後仲點咗春風得意腸粉，出面層腸粉皮包住中間塊春卷皮再包住蝦肉，有層次口感。腸粉仲可以配搭甜醬同芝麻醬，如果蝦肉餡多啲豐富啲會更好。淡綠色嘅斑蘭流沙包外皮好柔軟，雖然斑蘭味唔算太出眾，但個個包都做到流心奶黃效果，流沙內餡亦算口感順滑，整體不過不失。最後以香芒糯米卷作結。芒果好鮮甜，芒果糖糯米嘅比例係9:1，食完唔會覺得滯。