雞湯小聚

營業中

休息中

最近發現TOP地庫開咗間新嘅小店，主打多款養生雞鍋，可自行選擇湯底、配料同主食，另外亦有雞湯米線供應。店內環境好大，分分鐘大過Food Court Area，座位闊落，卡位為主，空間感十足，食完都唔會話好大陣味，經過可以一試。養身雞鍋要咗招牌嘅花膠雞同懷舊藥膳湯，湯底濃郁，飲落暖胃，真材實料，有埋原塊花膠同紅棗等，煮至入味，各有千秋。配料五選一，豬牛雞或墨魚片，私心推介牛小排，鮮嫩多汁，薄切唔嚡、另可額外加配，廣島蠔三大隻，鮮甜入味，值得一試、仲有盤好新鮮嘅時令蔬菜，讚。若唔想食得咁Heavy嘅亦可以選擇叫雞湯米線，價格親民，款色眾多，有藥膳、椰汁雞、麻辣鴨血、胡椒豬肚、番茄牛肉等，雲吞雞份量唔少，啖啖肉，湯底同樣出色，主食可配白飯、米粉、刀削麵、菜底或烏冬，店員推介米線，吸滿湯汁，入口滑溜，就算放咗段時間都未到發脹，性價比高。