九份•十分 (河畔花園) (已結業)

早一陣子先去完台灣旅行，深深俾台灣美食吸引住，所以今日來到沙田呢邊食午餐都忍唔住要去九份十份回味一下台灣既點滴。我叫左紅燒牛肉麵 (HKD 62)，鹽酥雞 (HKD 42)，飲品就要綜合水果茶 (HKD 18)。至於甜品就選擇左草莓雪糕鬆餅 (HKD 62)。牛肉麵賣相唔錯，紅燒牛肉非常稔，口感入口即溶，分量都唔細。湯底味道夠，麵底我就要左粗麵，夠哂煙韌。紅蘿蔔就幾清甜。至於鹽酥雞，我既飛佛之一，炸得非常脆，而且啖啖肉，正呀。餐廳為左配合唔同客人既口味，好細心地有7種唔同味道調味粉，讓客人自己選擇。味道有原味，梅子，芝士，咖哩，紫菜同埋香辣。我個人就比較喜愛芝士同紫菜。至於個水果茶，有唔同既生果，有蘋果，菠蘿，橙，藍莓等等。不過佢係附有一個檸檬冰，店員建議我地要先將果茶倒進有檸檬冰既杯，跟住慢慢享受。呢個既做法就會令到果茶酸酸甜甜，非常開胃。至於個鬆餅賣相非常靚，有4塊鬆餅，有濃厚既雪糕，草莓醬同埋新鮮既草莓和奇異果，非常適合草莓控既我。鬆餅口感鬆軟，加埋雪糕，草莓一齊進食，係人生一大快事。值得一提既係店員服務既態度不俗。