森林麵包

營業中

休息中

喺網上面聽聞呢一間街坊小店嘅拿破崙質素非常之高，所以今次就藉住侄仔嘅生日，訂咗一磅嘅士多啤梨拿破崙嚟試吓，一試果然並非浪得虛名，屋企大人細路都鍾意，簡直皆大歡喜！首先個酥皮係相當之香，用咗日本麵粉，咬落相當酥脆，充滿陣陣牛油香味。然後吉士相當之幼滑，唔會太甜，而且有一粒粒雲呢拿籽，配合埋新鮮酸酸甜甜嘅士多啤梨，成件事配合得非常之好，令人印象深刻。本人之前都試過係一間尖沙咀酒店訂過芒果拿破崙，但質素都冇呢一間咁好，吉士比較甜，而且價錢差唔多要成$400。以$258 一磅來講，呢一間嘅水平係絕對係物超所值，性價比冇得輸。而且呢間舖頭嘅位置位於觀塘嘅舊屋村裏面，服務街坊大眾，感覺上平易近人，令人陪感親切，我之後都會得閒過嚟買下曲奇、蛋撻、雞批，多D 幫襯呢啲非集團式嘅小店。