翡翠拉麵小籠包 (已結業)

星期日周圍都咁多人，見翡翠2位唔洗等，一入到去，正呀！有得坐搭建出來的加建座，就座落喺通道邊（正確黎講係坐喺走廊），食得咸魚抵得渴，ok我坐。全晚侍應們服務就真係幾ok，有求必應，加茶添水都好快手，落單追單都無托手踭。好，講吓食物先，呢晚食咗：醉豬手：冷盤，酒味幾濃郁，好在斬開細細件幾易食，豬皮幾爽口，筋位少韌，整體有咬口，但豬毛唔算去得好清。蘿蔔絲酥餅：上枱時有d失望，酥餅根本未夠火喉，外層竟然係白色？（應該金黃色噃師傅），咬一啖，係囉！入面d蘿蔔絲仲硬嘅，唉⋯青菜煨麵：有d驚喜，麵幾滑身，吸收咗高湯精華，入囗唔洗點𡁻，青菜亦淋中帶爽。上海小籠包：皮薄，啖啖肉汁，肉饀嫩滑，惟稍欠鲜味。乾煸四季豆：炒得幾乾身又唔算太油，肉碎入味，不過四季豆去豆筋去得唔清，要邊食邊撕走d豆筋，唉⋯（茶記食呢個餸都未試過要自己撕豆筋噃）。