駿景軒

營業中

休息中

同大肥爸爸上星期揸車時，發現原本喺跑馬地o既「英皇駿景酒店」經已成功遷往灣仔，連酒店中菜廳「駿景軒」都正式啟埋業，週日即約埋家人一圍去飲茶，實行去八一八。步入大堂已覺酒店比從前光鮮有氣派，加上面前一棵大而鮮美亮麗o既聖誕樹，望落勁醒神。餐店佔用面積兩層，隨咗可以乘坐升降機上落，堂內亦有寬闊o既樓梯通往「駿景軒」。可能新店用多咗玻璃窗，透出o既天然陽光令室內更顯雅致大方，餐桌椅櫈又雪白潔淨，環境衛生絕對升哂呢。服務生班底冇變，上下齊心o既態度仍然誠懇友善，只係大家o既服裝年輕化咗，新裝意外地同時令場內o既氣氛冇咁拘謹。驟眼睇，點心紙上o既菜式同舊舖大至上都差唔多，只係價錢略有提高。細問下，得知茗茶每位$24，另設加一服務費。新張期間，每枱客人都可免費享用一客「招牌口水雞」。口水雞（免費贈送）：相信樓面伙計早已習慣有辣得同唔辣得兩種食客，所以雞品o既口水汁為另上。未點汁o既白切雞幼嫩白滑。個人唔係咁辣得，不過小姪兒就大讚個口水汁辣得黎又香又濃，比普通辣油「有個性」，形容得極之生動，故細佬亦好想喺度同大家分享。擔擔麵（$48）：小姪兒嗜辣，埋位即應XO爸B極力推薦，點咗碗鎮店「擔擔麵」黎食。