心夜來潮 (已搬遷) 新店位置

同舊朋友好耐無見, 今晚終於約到出黎食飯見面. 朋友提議話去近大角咀依間叫"心夜來潮"人氣餐廳! 一聽到個名, 我覺得好攪笑! 真係心夜來潮黎食飯!我好奇就問食咩嘅? 朋友話多元化. 有海鮮有鴨有魚蛋, 唔止只係潮州嘢!聽落唔錯. 就去試吓啦! 原來依間真係小店,地方唔大! 但我估一定幾好食, 因為都有好多人等位. 我地都要等咗10分鍾先有位. 其實大家唔介意地方夾窄. 因為小店出品多數都比連鎖好好食! 另外仲有一樣欣賞係依間店舖, 就係全部年青人攪的. 一定要可以支持年青人創業! 我地叫咗小米餃, 一共有8粒只係20蚊! 皮質煙韌, 食落好似魚皮餃,好食有魚味道! 另外我地仲叫咗醬鹵鴨$68 味道濃郁,肉質鬆化, 加上佢地獨特嘅鹵水味, 味道適中!係我最鍾意食嘅一道菜!兩個女仔, 我地仲叫正宗汕頭手打煎肉丸$28. 都有6粒左右啦! 嘩! 都幾彈牙, 自家製出品真係特別唔同! 真係可以用嚟打乒乓波!最後就係秘制醬香豬手$32! 大大件, 夠唸, 味道比一般鹵水豬手更正! 非常抵食! 總括嚟講! 依幾個年青人出品認真, 非常有心思誠意! 平均每人都係$80, 下次真係要再嚟支持下!