和花亭壽司 (已結業)

從朋友處得知和花亭的二人套餐有6折優惠，只要$268就可以食到咁多款日本料理，而且朋友之前試過質素唔差，所以知我鐘意食日本嘢就想帶我去試。今次加上另外兩位朋友同行，一行四人，所以除左叫咗個「極上御膳2人套餐」，都另外散叫咗啲小食同壽司，不過相片數量有限，今次就只集中講嗰2人套餐。極上御膳2人套餐 $268香芒蟹籽沙律 ，其實就係蟹籽沙律上面鋪上芒果，意外地芒果超甜，唔似其他鋪頭會用未熟嘅酸芒果，值得一讚。刺身四點 ，有三文魚、吞拿魚、甜蝦同帆立貝，雖然數量唔係多，不過以2人餐嚟講就剛剛好，少吃多滋味。整體好新鮮，特別係甜蝦同帆立貝！特上壽司什錦 ，都係啲非尋常嘅款式，不過就比較失色，味道唔錯但無驚喜。軟殼蟹天婦羅 ，每舊都好大件，而且食落鬆脆，唔會有「粉」嘅感覺，不過真係要趁熱食先好味。鹽燒鯖魚 ，另一道我幾鐘意嘅菜，燒得幾靚，重點係唔似其他鋪頭咁會好腥，調味都好夠，唔點嘢都好好味！豚肉豬骨湯烏東 ，用嘅係手打烏東，湯底唔會好味精，不過豚肉比較老，不過不失。芝士蛋糕 ，另一有驚喜嘅菜式，入口好濃香嘅芝士味，重點係香得嚟唔會覺得漏！正！不過食完無耐就裝修改餐牌，唔知重開時有無驚喜呢？