大喜屋 (已結業)

今日放工和妹妹黎到尖沙咀行街，所以就係附近搵野食。最近天氣又暖番小小，就想食日本野，咁放題就係最好既選擇。刺身，壽司，炸物，同熟食都有！今日餐廳安排左我地坐卡位，好闊落，好舒服。首先，我地每樣刺身都叫左試下，赤貝同象拔蚌都好爽，好鮮味。帶子切到細細粒，岩岩好一口食哂。除左壽司，仲有手卷，細細地，唔太飽，可以叫多幾份。我地就食左海膽手卷，好多海膽，紫菜脆卜卜，舔舔脷！之後想點番啲熱野，牛肉鍋同炒菜。然後見到有個榴槤愛好者必食，即刻心心眼。個脆炸貓山王黎到係熱辣辣，個流心好滑，麵粉唔多，超好食，好勁榴槤味。食到咁上下，想食啲小食，好食又唔飽肚既！所以我地就叫左鳳爪，八爪魚同子薑。鳳爪去骨，甜甜地又辣辣地，加埋啲子薑，非常開胃，抖下又可以再食過啦！然後再叫左個雞湯，暖番個胃，正呀！咁食日本野，又點少得清酒呢，可以揀凍或熱。我覺得個清酒清清地，好易入口。menu仲有梅酒可以揀，不過今日就夠啦，下次再飲！最後埋單前，待應俾左張雪糕紙我地，每人只可叫一杯，我就要左季節限定，原來係沖繩海鹽味，好好食，鹹鹹地，勁有奶味，非常滿足。下次朋友或屋企人生日，一定會再黎，位置好大，可以叫多啲人！