玉子造屋 (已結業)

好想喺呢度同A姐講聲對唔住，因為我已經深深愛上咗玉子喇！我鍾意玉子夠百變，無論佢係咩形態，每次佢都會表現最好嘅一面俾我睇，當我錫佢嘅時候，都會感受到佢濃濃嘅玉子香味。我就最鍾意佢漏晒出嚟嘅蛋汁，所以我哋被稱為「漏M之戀」！而當A姐知道咗我哋嘅關係，佢不單止無嬲，仲帶我去到將軍澳嘅玉子造屋同佢見面！芥末八爪魚芥末味唔攻鼻，少少辣，夠晒開胃，八爪魚份量多又有咬口。七味炸雞翼一份有4隻，雞翼大大隻，外皮脆卜卜，肉就夠juicy。黑松露牛油焗菌黑松露味唔算濃，淡淡嘅黑松露，反而突顯菇菌嘅鮮味。玉子咖哩吉列豬扒飯豬扒厚切，不過肉質有啲梅，而且皮唔夠脆，有少少失望。不過，賣點當然係玉子啦！玉子做成旋風形狀，蛋夠香滑，蛋味香濃。撈埋日式咖哩汁，真係好好味。龍蝦蟹肉親子丼半隻大龍蝦加多隻蟹鉗，好滿足啊！龍蝦雖然唔算大隻，但夠晒新鮮彈牙，仲有唔少膏添。蟹鉗細心幫你整爛個殼，食得好方便。仲有蟹子同洋蔥炒蛋撈飯，好鮮味架。