Serendib (已結業)

是日要OT，但一早約好左女朋友食lunch，唯有係公司附近食啦。女朋友上網見到呢間餐廳係食斯里蘭卡既野，我地兩個都冇試過，究竟斯里蘭卡係食咩架呢。入到餐廳，店舖細細，但牆上既裝飾好配合主題，仲有一張好似航海路線既地圖。我地兩個人，叫左兩個CURRY，同一份牛肉角。蒸米粉配咖喱(咖喱羊肉)一碟蒸米粉有4-5個米粉餅，就咁食會好乾，一定要點咖喱，所以選較濃味的咖喱也不怕。咖喱羊肉方面，咖喱較為辣但配米粉一流，羊肉唔SO但又好香口。炒芝士薄餅(咖喱雞肉)好特別！剛食落去有D似蠔餅的感覺，把所有配料混在一起，唔好睇佢份量好似有D細，好飽肚的。口感不油膩，可能當中包含左蔬菜，都算係健康之選。不過美中不足既係薄餅整體略濃味，如果淡味DD就PERFECT。其實食完以上兩樣都已經飽左。但女朋友又想試下D小食---最後揀左牛肉角。不過店員唔記得幫我地整，佢地勁唔好意思。時間唔太許可，唯有TAKEAWAY。牛肉角熱辣辣，以為好細舊，點知比我地想像中既大隻。外皮因剛剛炸起既關係好脆，外皮亦唔會好厚，餡除左有牛肉之外，仲有薯蓉咁黏住，好惹味。