添喜冰室 (已結業)

今日收工同朋友去旺角買衫，買完諗住食埋飯先返屋企，行經附近有間叫添喜冰室，發覺嘢食幾吸引，價錢又抵，所以就揀左呢間！因為二個人所以要搭枱，不過都預左，晩市多人嘛！入到去睇完餐牌就嗱嗱聲叫嘢食，因為勁肚餓，雖然多人，但上菜好快，大約等左十幾分鐘就上齊！首先食既係碎蛋大蝦牛角包，佢既碎蛋又滑好嫰，配俾新鮮原隻大蝦非常好食之後開始食佢地店員極力推薦小食拼盆，其實我曾經猶豫過，始終炸物怕肥，不過都豁出去，食完先算，首先賣相一流，有芝士青口，BBQ雞翼，炸蝦多士，炸洋蔥圈，尢其係炸蝦多士，賣相金黃通透，食落感覺每塊西多都炸得剛剛好，每一啖都夾著大蝦既香味，簡直係男士恩物，二件蝦多士份量十足，另外芝士青口都值得推薦，濃郁芝士加上肥大肉厚既青口，完全係最佳配搭！因為我地好鐘意蝦，所以仲叫左鮮茄大蝦意大利粉，佢地個意大利醬非常特別，除左濃厚蕃茄味，仲酸酸甜甜，非常惹味，而且意粉軟硬適中，口感十足！