燒洒一族

營業中

休息中

V City的一田樓層大裝修，超市範圍細咗，旁邊開多咗新舖頭，見有間埋燒味嘅叫燒洒一族，幾多嘢賣，店內光猛衛生感覺唔錯。新開張熱食有八折，冷盤就買三送一，好抵喎😋揀啲返去今晚加餸先。⭐自家製燒腩仔家人一向鍾意食燒肉，買返一條骨返去試下，層肥層瘦皮又脆，點埋個芥末醬真心正。⭐德式燒鹹豬手見隔離大媽二話不說揀咗兩隻特大鹹豬手，好似真係幾正咁喎，自己又叫返一隻先。店員問斬唔斬？唔斬就可以返去氣炸加熱，斬咗就方便食。我呢啲懶人就梗係斬咗方便啦，見店員幾下手勢就切好，仲排得好靚仔添。鹹豬手個皮相當脆，豬手唔肥皮下全部係瘦肉，入口鹹香，可以點埋蜜糖芥末醬，味道更有層次🤤⭐麻辣牛展家人愛辣，試下佢哋個麻辣牛展，一瓶望落唔大盒，但入面嘅牛展係塞到滿曬嘅，份量唔少。牛展薄切吸滿辣汁，麻麻辣辣相當惹味，即場煮返個米粉拌辣油先🤤⭐酒醉腎片最後就係酒醉系列嘅雞腎片，一打開就聞到酒香，同樣入面嘅腎片係塞到滿曬嘅，份量無稀場。腎片爽脆有咬口，加埋酒香，作為送電視嘅小食真係唔錯，唔覺唔覺就食曬成盒。呢度大概二百零蚊，一家四口食啱啱好。