財記美食 (已結業)

財記一向係飯堂，自從唔喺新蒲崗返工就少左去食，點知財記開左分店喺觀塘，都幾近我即刻黎試下先。同朋友夜晚黎，晚市唔算多人仲有卡位坐，點左幾個小菜，原來新張期內有九折，仲送例湯，餐飲同白飯，好抵食呀！是日例湯係合掌瓜豬骨湯，好鮮甜濃郁，飲完無口渴喎。先黎個香口野椒鹽九肚魚，即刻炸起熱辣辣，未埋到枱已經聞到香味。椒鹽啱啱好夠惹味，九肚魚外脆內嫩滑，大大碟勁正呀！整返個蔬菜蒜蓉粉絲蒸勝瓜，勁香蒜味呀。勝瓜爽口好多汁，滿滿的蒜香超正，下層啲粉絲吸飽了醬汁都好正，攞黎撈飯都好啱。最後仲有豉椒炒蜆，嘩，好大碟！隻隻都有蜆肉唔係得個殼㗎，啲蜆幾大隻。啲蜆炒得有鑊氣夠惹味，蜆肉大隻肥美，完全無砂，又係好正。凍飲加兩蚊，點左凍檸茶同凍檸水，夠晒凍，夏天飲透心涼。食咁多野都係205蚊，真心好抵食！