鶴崎居酒屋 (已結業)

印象中依個位置以前係一間西餐，當日放工妹妹就響附近等我收工，好想食日本嘢，就試吓呢一間。問過店員呢一間餐廳大概開咗三個幾月，我哋入座嘅時候剛好飛機空運到嘅海鮮到咗，咁新鮮冇理由唔食。一般來講呢間餐廳係用QR code自己落單，另外如果飛機貨職員會推介有興趣就直接搵職員落單就可以。我叫咗兩隻帆立貝，妹妹唔食生嘢，所以就揀燒嚟食，見到隻日本北海道蠔（$128）咁大隻，又要叫返一隻。 帆立貝（@$88）其實都唔係全熟嘅狀態有啲係半熟咁樣，超級大隻，味道極之鮮甜，啖啖肉。生蠔大過我隻手掌，佢唔會話太過重海水味亦都冇我唔鍾意嘅金屬味，上面有啲柚子醋，酸酸地，爽口，令人回味。炸物串燒，都唔錯。我哋分別點左雞軟骨$20、蘆筍豬肉卷$32、雞腎$28、七味墨魚咀$48同埋大蝦天婦羅$78。但係個雲糖壽喜鍋（安格斯牛小排）$188，好有特色。上枱之前店員喺旁邊整咗一個棉花糖，原來係放係鍋上面，甜味會帶入去個湯底。牛肉肉質好靚，有牛味。入邊嘅配料亦都唔會好吝嗇，分量足夠，我就另外加咗一個烏冬$25。我哋仲叫咗一個蘋果雪葩，為晚餐畫上一個完美嘅。好濃嘅蘋果味道，有啲似日本王林蘋果一樣咁清甜，妹妹表示好滿足。