港原味 (已搬遷) 新店位置

今日探完朋友，順便去大角咀附近搵吓有咩好嘢食，行過利奧坊見有間茶餐廳，快快食個飯就返屋企。餐廳望落新淨又光猛，牆身畫滿七十年代香港街道景色，有玩味感。望吓餐牌，見到有個農夫包好似幾吸引，有得揀咖哩或者係芝士黑松露汁，左諗右諗都係想試下芝士黑松露汁，仲有豬扒/牛/雞揀，我就揀咗配牛肉。農夫包都幾大份，切開脆卜卜，伴碟有啲沙律菜，牛肉份量都幾多！仲有D洋蔥，青椒等做配菜，食咗大半個已經好飽！另外老公叫咗個沙拉骨，沙律醬均勻沾滿左係排骨上面，排骨煮得香脆，加上醒胃嘅沙律醬，好快就餸完一碗飯。老公鍾意佢杯凍奶茶嘅茶底，我就較欣賞自己杯少凍咖啡嘅香濃，好港式餐室嘅味道.