OPPA韓國燒肉店 (已結業)

好耐冇帶表弟出街食飯，同隻牛高馬大既食肉獸緊係食放題最抵啦，所以呢晚真係瘋狂食肉，仲要係優質既和牛。餐廳首先上左和牛拼盤，排名有分先後既油脂咁香肉質嫩滑的A4黑毛和牛三角腩，肉味濃啲既A4黑毛和牛肩胛肉，M7澳洲和牛上頸脊，鹿兒島牛柳粒都非常值得一食再食。梨泰園牛排骨事前已醃過，燒出黎好惹味，唔使點任何醬汁，包生菜已經係韓國味。附送既深海虎蝦，大扇貝，鮑魚會加牛油一齊燒，好香口，又份量十足。紐西蘭羊架同神戶水飼黑毛豬都係靚肉，可以試試。海鮮方面我哋加左最後炒到散晒但都好多春既多春魚，彈牙既鱿魚。佢哋仲好多韓式料理，個人覺得最回本同保險係真露蜆湯同参雞湯，辣醬牛肉水冷面勁多牛展但好淋滑，估佢唔到，加埋個爆蛋汁既溫泉蛋都幾美好。記得點啲洋蔥圈同翠肉瓜配肉食，葷素搭配先唔好膩～仲可以飲埋檸茶解下油。甜品記得叫, 一人一份，有haagen dazs 士多啤梨味，movenpick 牛奶味同 dryers 揀，食完清一清口腔，超滿足!