Kuru Kuru自家製手作意粉 (已結業)

8咪半呢個場裝修後開左好多食市，今次食呢間係呢個場黎講算新開，舖頭細細唔多位，好在我黎到嘅時候冇乜人。坐低睇下個menu其實選擇唔多，2頁睇晒，價錢係1+2+3嘅概念，即係意粉係基本，每叫多一個湯/沙律/飲品就 on top 計錢，我就叫左個菠菜三文魚忌廉意粉同德國香腸椰菜蒜蓉蕃茄意粉，另加錢叫左杯自製冰茶同熱檸檬茶。意粉上枱嘅時候好香，放意粉隻碟係熱辣辣嘅，有助食物冇咁快凍，意粉因為係手作意粉，質感比超市買嘅包裝意粉實、 煙韌、飽肚，碟菠菜三文魚個忌廉汁好 creamy，但係食到尾如果凍左個汁會漿住個口有啲"漏"，而個德國腸因為有黑椒係入面，所以好香口，個汁反而係驚喜所在因為佢有蒜蓉，所以成件事就好香口。嘢飲方面杯自家製冰茶其實係普通紅茶入面加左2舊橙，因為佢個切法問題，舊橙好難篤，變相杯嘢就只有紅茶味，好在個茶底唔 溺澀。