紅米 (六合街)

營業中

休息中

今日早咗放工，天氣熱又唔想煮嘢食，就同家姐去咗附近新蒲崗嘅紅米食晚餐。本來想健康啲叫個菜，但係我哋最後叫咗邪惡嘅香濃芝士焗白汁煙肉西蘭花，芝士佈滿西蘭花，焗到有少少金黃色，配菜嘅粟米亦好甜。我叫咗個美國重量級爵士西冷，揀咗薯條做配菜，薯條偏粗身，有紫菜粉調味，唔洗點茄汁都ok。西冷上碟時熱辣辣，分量夠大而且肥瘦適中，肉身夠淋易切易咬，仲有黑椒醃製，就咁食都好夠味。家姐叫咗日式炸蝦冷烏冬伴煙三文魚，烏冬嘅芝麻醬一啲都唔唔手軟，所以烏冬夠濕潤，唔驚會太乾。煙三文魚好大塊，仲有青瓜、蟹子等等沙律做配菜，唔會覺得太單調。我哋仲叫咗蜜糖柚子烤雞翼做小食，雞翼烤到啱啱好，皮脆得嚟肉又juicy，柚子蜜甜甜地，好似燒嘢食搽嗰層蜜糖。炎炎夏日，當然要晏涷嘢飲啦，我就叫咗綜合水果茶，可以叫少甜，入面仲有菠蘿、水蜜桃，非常清新。家姐就叫咗藍蝶花雪梨蜜伴愛玉，味道偏甜，加埋愛玉可以當甜品食。